Image Jeanine Áñez, Bolivia Jilïr Irpiri (Jamuqa: BTV)

Jeanine Áñez Jilïr Irpirix “Irnaqañ Amta” jichhürux uñt’ayawiyi, ukampix 600 waranq irnaqäwiw Bolivia qullqichäw ch’amachañatak uñstayatäni sasaw sawiyi.

“Yanapirinakajaruw mä jach’a amta wakt’ayapxañap mayiwaytha, mara t’aqa phaxsitpach walja irnaqäw uñstayañataki. Qullqichäw kutitatayañataki, laq’ux jan walt’ayki ukatat sarantañataki. Uka amtax Irnaqañ Amta satäniwa, 600.000 jaqir yanapañatakïniwa” sasaw Bolivia TV ukan arsuwiyi.

Yänak lurasa, utachasaw irnaqäwinakax uñstayatäni. Kawkhanti irnaqañax utjkan ukja pachpa chiqankirinakan irnaqapxani.

“Utanak askichañäni, jach’aptayañäniwa, markasatak munaski uka utanakaw luratäni, jach’a qullañ utanaka, jisk’a qullañ utanaka, sinti jan wal markanakan jikxataski taqi uka utanaka, jaytarpayat kunawa” sawiyiwa.

Ch’umi chiqanakans suni uraqins yapuchäwiw ch’amachatäni, qarwa kast uywanakaw juk’amp sum uywatäni, machaq tecnologíampiw yapuchatäni, ukhamatw anqa markanakarux Bolivian yapuchat achunakax aljatäni sasaw sawiyi./RAR