Image Santa Cruz departamenton p'iqichir palla pallaw jiwirit amtasiski

Raúl Gareca Díaz, La Guardia markan palla pallanakar p’iqichiriw jichhürux COVID-19 usump jiwawayxi, jupampix palla pallanak taypinx pusiniw jiwxapxi.

Hebert Fernández, Santa Cruz municipion qullañ p’iqichirix jupax jiwaskapiniwa sasaw jichhürux arsuwiyi. Uka palla pallax janiw uñstxänti, ukhamarus irpirinakax jupan usutapatx yatxatapxakipinïnwa.

Jeanine Áñez Jilïr Irpirix jiwirin wila masinakapar chuymacht’awiyarakiwa, Twitteranw arsuwiyi. “Raúl Gareca Díaz p’iqichir palla pallan wila masinakapampir yälanakapampiruw chuymacht’añ muntha. Jupax Bolivia markachirinakar arxatasaw jiwañar purt’asiwiyi, markasaruw yäqayawiyi. Tatitux jupar katuqaspan. Wila masinakaparux uñjapxäwa” sasaw Jilïr Irpirix llikan arsuwiyi.

Santa Cruz palla pallanakan p’iqichiripax chikürükipanw jiwiritx amtasiwiyi, jupamp chikax uka departamenton palla pallanakar p’iqichirinakampiw yaqhip marka irpirinakampiw jiwiritx amtasiwiyapxi, tata Wilson Santamaríax ukankawiyarakiwa, jupax Markachirinakar Arxatir Kamanarakiwa.

Akhamanak uñjasax amuyt’asiñasawa, aka COVID-19 usux jan waliwa, ukatw utan jist’antat jakapxam sasin sapkistu ukjax phuqhañasa, yaqha iwxanaks ukhamaraki sasaw palla pallanakax iwxt’awiyapxi./RAR