Image Machaq p'iqichirinak utt'aykasa (Jamuqa: BTV)

Jeanine Áñez Jilïr Irpirix tata Óscar Ortiz Anteloruw Qullqichäw Jiltayañ P’iqichirjam utt’ayawiyi, tata Fernando Iván Vásquez Arnésaruw Qhuya Irnaqañ P’iqichirjam utt’ayawiyaraki. Marka Apnaqañ Utanw jupanakaruw ukham utt’ayawiyaraki.

Markasanx COVID-19 usuw uñstawiyi, ukatw paypach tata p’iqichirix wali irnaqañanïpxi. Ortizax irnaqäwinak uñstayañapa tata Vásquezast qhuyan irnaqañ ch’amachañaparaki, ukhamatakw markasan qullqichäwipax jiltayatäni.

“Ortiz senadora, walik purt’antaxa, pä amuyuw jumar jawillt’kasax utjitäna. Nayraqatax jumax qullqichäwis kutitatayañatakiw irnaqañama, irnaqäwinak markasan utjañapataki, utan jist’antat jakañ utjkipanx utjäwinakanx qullqichäwix aynacht’askiwa (ukata). Markachirinakar yanapt’añatakix qullqi yanapt’anak uñstayawiyapxtha; ukatatx yanapt’asis irnaqañaw waljanitak uñstayaña. Jumax jan samart’as ukhamäñapatak irnaqt’am” sasaw sawiyi.

Tata Ortizax Kamachiñ Tantachäwin qullqi lunthatanaktuq irnaqawiyi, jan walt’äwinak yatiyawiyi; tata Vásquezax qhuyan irnaqañatx wali yatiñaniwa, P’utuxsitawa, markasan irnaqatats anqa markanakan irnaqatats wali yatiñaniwa sasaw Jilïr Irpirix arsuwiyi.

“Qhuyan irnaqasakipiniw markasax jiltayata; ukatw markasan sarnaqäwipax jilpachax qhuya sarnaqäwjama. Ukatw Bolivia markan sarnaqäwipamp markachirinakax sartasïwinakampinx qhuyan irnaqapki uka Bolivia markachirinakan sarnaqäwipjama” sasaw sawiyi.

Janir arsuñ tukuykasax, tata Wilfredo Rojompir tata Carlos Fernando Huallpampiruw yuspajart’awiyi, jupanakaw p’iqicht’añ tukt’ayawiyapxarani, nayrïrix Qullqichäw Jiltayañ P’iqichirïnwa, payïrist Qhuya Irnaqañ P’iqichirirakïnwa./RAR