Image Irpirinajax amtw rixt'asipki (Jamuqa: Marka Apnaqañ P'iqichirin uñt'ayata)

Marka apnaqañ P’iqichirmp Yatichañ P’iqichirimpix yatiqañ utanakan jan ñanqhachir qullanak apnaqapxañapatakiw amtanak rixt’awiyapxi. Jeanine Áñez Jilïr Irpirix ukankawiyarakiwa. Jichhürux Ñanqhachir Qullanak Apnaqañtuq Sartasiñ Uruw uraqpachan amtata ukatw ukham jikisiwiyapxaraki.

Jilïr Irpirix kunjams ñanqhachir qullanak apnaqirinakax markasar jan walt’ayapxi ukxatw arsuwiyi. Anqa Markanakatw jan wali jaqinakax markasar jan walt’ayir jutapxi, “Mä markan ñanqhachir qull juk’amp apnaqapki ukjax uka markax jan walituquruw saraski” sasaw Jilîr Irpirix arsuwiyi.

“Awiya Yalanx ñanqhachir qullanak apnaqirinakaw markanakx apanqawiyapxi. Marka apnaqir qutunakaruw qullqx churawiyapxi, sartasiñatakiw qullqx churawiyapxi” sasaw jilïr Irpirix arsuwiyi. Ñanqhachir qullanak apnaqirinakampit jan wali kukampit arxatasiñatakiw yaqhipax palla pallanakar markasanx jan walt’ayapxi sasaw Jilïr Irpirix arsuwiyi.

Wayna tawaqunakan ñanqhachir qullanakamp jan jan walt’apxañapatakix walikpin akham irpirinakpurax amtx wakt’ayapxtaxa sasaw sawiyi.

Yatiqañ Utanakanx akham mayacht’asisaw ñanqhachir qullanak jan apnaqapxañapatakix irnaqatäni; ñanqhachir qullanakampiw jiwañarus purt’assnawa sasaw Arturo Murillox arsuwiyi, jupax Marka Apnaqañ P’iqichirirakiwa.

Kunjams Marka Apnaqañ P’iqichirix irnaqi ukw tata Cárdenasax jach’acht’awiyaraki, jupax Yatichañ P’iqichirirakiwa. Markasan utjki uka yatiqirinakar chhijit jark’aqañatakiw jichhürux akham amtasipktha, utjäwinakan jan chhijix utjañapataki sasaw sawiyi./RAR