Image Arturo Murillo, Marka Apnaqañ P'iqichiri (BTV)

Qucha Pampanx, Chapare uraq jark’antapxani, utat utw usutanak jikxatañatak sartapxani, ukhamw jichhürux Arturo Murillox yatiyawiyi, jupax Marka Apnaqañ Kamanarakiwa. Qullañ P’iqichirinakamp palla pallanakamp jach’unakampiw jupax tantachasiwiyi, ukatatw ukham yatiyawiyaraki. K’añaskunakarux janiw yaqha provincianakar sarayatäkaniti, ukhamat Qucha Pampampin Santa Cruzampinx usutanakax jan juk’amp jilxattkaniti sasaw arsuwiyi.

“Chaparenx sartatäniwa. Palla pallanakampiw aruskipatäni, qullirinakampi. Utat utw Qucha Pampa ch’umi uraqinx (usutanak) jikxatañatak sartapxäxa. Jark’antasax janiw jaqit armasipkäti, janiw ukham sañ munkiti (…) Jiwasax khithinakati chhijir purirjamäpki jupanakaruw jikxatapxañaja, jan jiwapxañapatakiw uñjapxäxa, utjäwinakapankirinakarus ukhamaraki” sasaw sawiyi.

Chapare uraqin usutanakan jilxattatapatw Murillox arsuwiyi, Qucha Pamppachanx uka uraqinw 35% usutax jikxatasi, 45% jiwataw ukankirinakaraki sasaw sawiyi.

Villa Tunari qullañ utarux COVID-19 usuninakar uñjañatakiw qullañ yänakax puriyatäni, ukhamat usutanakax Qucha Pampan jan phuqharkaniti sasaw Murillox arsuwiyi.

“Nayraqatax, janiw yaqha provincianakarux jaq’i q’ipt’at k’añaskunakax sarayatäkaniti. Jank’akiw usutanakax jikxatatäni (…) Villa Tunari jach’a qullañ utanx kunas munasi uk yatiñatakix (Yercin) Mamani qullirimpiw aruskipawiyapxtha (SEDES irpiri), yänakast puriyatäniwa” sasaw Murillox arsuwiyi.

Qucha Pampanx irpirinakax janiw chikt’at irnaqapkiti; ukhamïpanx jupanakax chikt’at irnaqapxaspa ukaw munata, ukhamat COVID-19 usux jan juk’amp saratatkaspati sasaw sawiyi./RAR