Image

Markasanx, 7.000 usutat jilaw wila umampix COVID-19 usut qullasipxaspa, khithinakati uka usurux atipjawiyapki jupanakaw uka wila umx churapxaspa sasaw mama Shirley Francox wasärmax arsuwiyi, juapx Unidad Demócrata (UD) uka taman diputadoparakiwa.

Khithinakati COVID-19 usut waliptawiyapki jupanakan wila uma churapxañapatak mä uta utjañapatakiw mama Francox mä kamach utjañap wasürux mayiwiyi, wila uma churirinakarux yanapatäspawa, irnaqäwinakapat jan paylläw iraqayasis ch’usasipxaspa, umampit lusa qhanampitx iraqatäspawa sasaw jupax sawiyi.

“Pusi COVID usutaruw maynin churat wila umax jikt’aspa (…) 13.000 usutat jilaw utji, tunka kimsan waranqpachatx 16% qullasiwiyapxi, ukhamax pä waranq jaqiw waliptatax utji. Bolivian uka pä waranq jaqix utjchi ukax paqall waranqat jilaniruw jupanakax yanapt’apxaspa, khithinakati COVID usump usut jikxatasipki jupanakaru, Anchhax usut jikxatasipki jupanakat taypitx chikataniruw waliptaysna” sasaw mama Francox arsuwiyi.

COVID-19 usump usuntat jikxatasipki jupanakarux wila umampiw juk’ampis qullata, ukatw mama Francox khithinakati uka usut waliptapki jupanakan wilap churapxañapax askïspa sasin sawiyi./RAR