Image Yerko Núñez, Jilïr Irpirir Yanapiri (Jamuqa: Jilïr Irpirir Yanapiri)

Jeanine Áñez Jilïr Irpirix chhijlläw utjañapatakix kamach rixt’aniwa, Kamachiñ Tantachäwinkirinakax jupar apayañ amtapki uka kamachi sasaw tata Yerko Núñezax markachirinakatak mä qillqat ullas arsuwiyi. Uka kamachinx sata qallta phaxsit 6 uru saraqkipanw kamachix utjan sasaw sixa, ukhamarus Chhijllayañ Utankirinakamp (kastill arunx TSE) kamachirinakampix janiw kunjams ukham lurasax markachirinakax usuntapxaspa ukxatx amuyt’awiyapkiti sasaw arsuwiyi. Khithinakati ukür chhijllasiñap amtawiyapki jupanakaw kunas utjan ukax juchanïpxani sasaw sawiyi.

Jilïr Irpirix uka kamachx rixt’aniwa, yaqha irpirinakar yäqañatakiw ukham lurani, Kamach Lurañ Tantachäwinkirinamp Chhijllayañ Utankirinakampiw ukham lurañ mayisipki; Jilïr Irpirimp yanapirinakapampix janiw chhijlläw jan walt’ayapkäti, mama Áñezamp irnaqir irpirinakax janiw aka markx wiñay apnaqañ munapktti sasaw tata Núñezax arsuwiyi.

Chhijllayañ Utankirinakamp kamachirinakampix jank’akiw uka kamachx amtawiyapxi, jupanakax markas apnaqañatakiw ukham lurawiyapxi, janiw markachirinakan k’umar jakapxañapatakixa sasaw arsuwiyi.

Chhijllayañ Utankirinakamp kamachirinakampix janiw yatxatat jaqinakar COVID-19 usxatx chhijlläw amtañatak jiskht’awiyapkiti sawiyiwa. Chhijllayañ urux uka usurjam amjuyt’atäpan sasaw sawiyapxtha; qullirinakamp yatxatat jaqinakamp uka usxatx amuyt’ayapxpan sasaw sawiyapxhta; chhijllayañ uru amtañatakix kuna yatxatäts jiskht’apxpachati, MAS ukankirinakakich kamisti munki ukhamarjam uka chhijllayañ urx amtpacha sasaw tata Núñezax arsuwiyi. Lakan phaxsinw juk’amp usutax utjan sasaw yatxatat jaqinakax sawiyapxi, chhijlläw jak’a, sawiyiwa.

COVID-19 usux markasan saratataskiwa, ukhamäkipanw chhijllayañ urx amtawiyapxi sasaw jupa tata irpirix arsuwiyi.

“Khithinakati sata qallta phaxsit 6 uru saraqkipan chhijllayañ urüñapatak amtawiyapki uka marka p’iqichirinakampir irpirinakampiruw mayiñ muntha, tata Evo Morales Aymaru, jupanakax (COVID-19) usux sint jan walt’aykipan chhijllayapñatapat kuna jan walt’äwix utjan ukax nayaw juchanït sasin sapxpan” sasaw sawiyi./RAR