Image Irnaqañ Uñjir Kamanan arsutapa (Jamuqa: ABI)

Chharminthix tata Oscar Mercadow yatiyirinakamp aruskipawiyi, utatpach irnaqañatakiw amtanakax iyawsasiwiyi, jan irnaqañ utanakan jaqin phuqhthaptapxañapatakiw ukham luratäski sasaw sawiyi, jupax Irnaqäw Uñjañ P’iqichirirakiwa. Uka amtanakatx markachirinakan kunayman irpirinakapampiw aruskipaña sasaw sawiyi.

“2020/20 jakhun amtwa p’iqchañ utan amtawiyapxtha, ukham (utatpach) irnaqañ utjañapataki, markasan wakiski ukjanakan utjañapataki” sasaw yatiyirinakar sawiyi.

Utatpach irnaqañax Bolivian nayraqat uñstayata, jiwas jak’an jikxatasipki uka markanakanx janirawa sasaw tata Mercadox arsuwiyi.

“Aksankir markanak taypinx jiwasaw utatpach irnaqañatakix kamach nayraqat uñstayasktan” sawiyiwa.

Janiw akham usunak sarnaqkipan irnaqañatakik utatpach irnaqañ utjañap amtawiyapktti, “ukham utjaskakiniwa” sasaw qhanancht’awiyi. Ukham utatpach irnaqañ munapki jupanakarux irnaqayirinakax paylläw iraqapxañapawa sasaw arsuwiyi.

Sapa jaqin irnaqataparjamaw ukham irnaqañax utjani, k’añaskuninakar q’ipiyasitat qullqi churañax juk’aqtaniwa, janiw walja jaqix jikthaptkaniti, irnaqayirinakax kuna tecnología yänakay irnaqañatakix wakischi ukw churapxañapa sasaw tata Mercadox qhanancht’awiyi./RAR