Image Lucy E. jupax FELCC ukankawayki ukja (Jamuqa: BTV)

Taripirinakax Q’ara Q’ara p’iqichirinakax mutuñ utar jist’antatäpan sasaw wasürux amtawiyapxi. Jupanakarux markachirinakar axsarayañ munapxatapata, usuntayañatakjam sarnaqapxatapatw taripasipki, Qucha Pampan thakh jark’antañ p’iqichapxatapata. Lucy E. jupampir Osvaldo G. jupampirux 30 urwa mutuñ utar jist’antapxani, Reimi C. juparust suxta phaxsraki.

“Yatxatat qillqatanakan mayitax uñstki ukanakatx chiqapinit jupanakax yatxatatäki uka luräwinakanx uñstapxi ukaw yatxatawiyata, ch’amamp axsarayañ munapxatapatw juchax kamachirjam jaquwiyata. (Jan imantasipxañapatakix) mutuñ utar jist’antañaw mayitäski” sasaw tata Omar Mejillonesax arsuwiyi, jupaw taripayañatakix yatxataskaraki.

Khuri walüruw  jupanakarux Qucha Pampan katuntawiyapxi, ukatx Chukiyawuruw apanxapxaraki. Akanx pä kutw taripirinakax wasürux tantachasiwiyapxi. Nayrïr tantachäwinx, Lucy E. jupar 30 uru jist’antañw amtawiyapxi, jupax Movimiento Al Socialismo (MAS) ukampiw senadorjam chhijllayasiñ munaskaraki. Obrajes watañ utankaniwa, Osvaldo G. jupar San Pedro mutuñ utan 30 uru jist’antañx amtawiyarakiwa. Payïr tantachäwinx Reimi C. jupariuw suxta phaxsi jist’antañ amtawiyapxaraki.

Q’ara Q’aran sartasiwiyapki ukanxay jupanakax p’iqichawiyapxchispäna, ukatw ukham amtawiyapxaraki, yamakis t’una warañ chiqarux janiw k’añaskunakarux mäkhipayawiyapkiti sasaw sapxi. “Aka marax, llamayu phaxsit 11 uru saraqkipanw ukham lurawiyapxaspäna (…) ukanx bazucanakamp jupanakan lurat escudonakamp apnaqasipkchispäna, thakhi jark’antatats ukhamaraki, ukham yatxatataw laphinakanx utji. (Jeanine Áñez) Jilïr Irpirin amtatapaw thaqhtañäspa” sasaw tata Mejillonesax arsuwiyi./RAR