Image Bolivia markachirix kutnuqaniskiwa (Jamuqa: Periódico Bolivia)

COVID-19 usun uñstatapat utan jist’antat jakañ utjkipanx, 5.986 Bolivia markachiriw markasar kutt’anipxi, wasürkamaw ukhama, sasaw anqa markanakar mist mantayir irpirinakax (DIGEMIG) yatiyawiyapxi.

“Janir markasar mantankasax, taqi marka masinakasaw jan usuntañatak amtanakax utjki ukx phuqhawiyapxi”, ukhamax janiw jupanakax usx piykatapkaniti sasaw tata Marcel Rivasax arsuwiyi, jupax DIGEMIG p’iqichirirakiwa.

1.429 markachiriw awiyunat purnuqanipxi, 4.557 markachiriw k’añaskut purnuqanipxaraki, juk’ampis Chilet purinipxi sasaw tata Rivasax arsuwiyi. Wasürux 447 marka masisaw Iki Ikit (Chileta) purinipxi, uka jach’a markan jupanakax jan usuntañatak qhiparasipäna. Jupanakax aka llamayu phaxsit 21 uru saraqkipanw yaqhaqtat uñjapxani, ukatatx markanakaparuw kutt’apxarakini./RAR