Image Alexander jan walt'äwit jucha jaqutanaka (Jamuqa: Llikan imata)

Chukiyawu, 2015 maran qasäwi phaxsinkir 27 urupa (BTV).- Madelen Paola Pahe Chambi, Alexander wawan uñjir taykapaxa, laqak taripayasiñwa mayiwiyi, ukhamat phisqha mar jist’antatäñapatakiw juchanchata, uñjirin lurañanakap jan yäqatapata ukhamarak jan phuqhatapata, sasaw Jucha Yatxatirin mä yatiyir laphipax qhanancht’i.

“Madelen jupax Virgen de Fátima Wawa Utanw Alexanderan yatichir “mamitapanxa”, jichhax uka chiqax Niño Jesús satäxarakiwa, Chukiyawunkir Juzgado Tercero de Instrucción en lo Penal uksankirinakaw juparux phisqha mar jist’antañatak juchanchawiyapxi”, sasaw Jucha Yatxatirin laphipax qhanancht’araki.

2014 maran lapaka phaxsinkir 12 urupanx , Alexanderax kimsaqallq maranikiskänwa, jupax “Virgen de Fátima” khuyapayañ chiqan payïr utapanw ikiskäna,  juchanchat warmin uñjataw jikxatasiskäna, sasaw luratanak yatxatatanakanx qhanancht’asiraki.   

“Uñjirin lurañanakap jan yäqas ukhamarak jan phuqhasaw, aka warmix juchani, ukatw wawarux Wawa Qullañ Utar laram janchin, ch’uñult’at ukhamarak jan jakäw uñacht’ayas apatänxa, ukatatx 18:30 pacharux Juan XXIII Qullañ Utan jiwarakïnxa” sasaw Paúl Franco Zamora Chukiyawu departamentun jucha yatxatiripax qhanancht’awiyaraki.

Alexanderax Wawa Qullañ Utaruw nayraqatax apatänxa, ukanx Unidad de Terapia Intensiva ukar apatäñapw amtatarakïna, ukampirus khä chiqanakanx janiw khithimpis mantirjamakänti, ukatw Juan XXIII Qullañ Utar apañatak amtatarakïna, ukax Munaypatanw jikxatasiraki, khayarux jiwataw purirakïna./ERAR