Image Usutanakak thaqhirinaka (Jamuqa: BTV)

Santa Cruz jach’a markanx 11 distritoruw COVID-19 usutanak utat uta sartas katjawiyapxi, 66.000 jaqit jilaw uka usunjamaki sasaw wasärmax tata Fernando Lópezax arsuwiyi, jupax Marka Arxatañ P’iqichirirakiwa. Jichhürkamax usut thaqhirinakax 468.491 jaqimpiw jikisiwiyapxatayna, 83.590 utjäwiruw purt’awiyapxarakitayna.

“Usutanak thaqhirinakax utat utw sartasipki, ukaw wakiskiri. Jaqinakampiw aruskipapxi, ukhamatw utjäwinakanx llakx apaqapxi. Yamakis puritäki a uka uta jak’anakanx qullirinakamp usut q’ipiñ k’añaskunakampiw utji, sinti jan wal usutanak utjki ukjax jupanakaw utanakar puripxi” sasaw tata Lópezax arsuwiyi.

Usutanak jikxatapxchi ukax mä qhiparañ chiqaruw jupanakarux irpata, markachirinakax ukx iyawsapxañapawa, jan janiw sapxpanti sasaw sawiyi.

“Utatx (usutanakatak utjki uka) qhiparañ chiqaruw sarapxani. Qullirinakaruw (jupanakarux) uñjapxani, sum manq’ayapxani. Ukhamatw walja jaqix sinti jan walt’at qullañ utanakar jan puripkaniti. Ukatw utjäwinakanx uka usut uñjañ chiqanakar sarapxañapatak iyawsapxañapa” sasaw jupa tata irpirix arsuwiyi.

Alcaldíamp Santa Cruzan qullañ p’iqichirimp (SEDES) yanapkipt’asisaw usutanakax thaqht’atäski sasaw tata Lópezax arsuwiyi./RAR