Image Jeanine Áñez, Bolivia Jilïr Irpiri (Jamuqa: BTV)

Movimiento Al Socialismon (MAS) chhijlläw utjañapatak jawillt’atax markachirinakan k’umar jakäwip jan walt’ayi, Covid-19 usu utjkipans juk’a pachanak chhijllayañ munapxi sasaw Jeanine Áñez Jilïr Irpirix jichhüw sawiyi.

“Markasaruw sañ muntha, uraqpacharuw sañ muntha, anqa markanakan jaqir arxatirinakaruw sañ muntha, uka jawillt’äwimpix Bolivia markachirinakan k’umar jakäwip sint jan wal walt’ayasipki” sasaw Áñezax llikan mä qillqat uñt’ayawiyi.

Evo Morales nayra irpirimp Luis Arce Catacora MAS chhijllayasirimpiw usu utjkipan chhijlläw utjañapx amtawiyapxi; ukatw Kamachiñ Tantachäwin kamach iyawsayawiyapxi, jupanakaw “ukx apnaqapki, munapki ukhamarjamaw apnaqapxi”, ukatw 90 urun chhijlläw utjañap amtawiyapxi sasaw qhanancht’awiyi.

“Bolivianx, mun jan munaw jaquña, suxta waranq waranq jaqir mä urun anqar usu utjkipan mistupxañap mayisax walja waranq waranq jaqiw (covid-19 usump) piykatayasini, walja patak patak jiwataw utjarakispa” sasaw sawiyi.

Evo Moralesamp Luis Arcemp marka apnaqañ munapxatapat ukham jank’a jank’ak chhijlläw utjañap amtawiyapxi, musphkayawa sasaw sawiyi.

Ukatw Jilïr Irpirix MAS ukan amtat kamach mayamp k’umiwiyi.

“Chhijlläw utjañapx munapxtwa, chhijllayañäniwa, usux lurañjamäkan ukjaw lurañäni. Qullirinakamp yatxatatanakamp Chhijllayañ Utankirinakampiw kunürus jaquñjamäspa ukx jiwasar sapxañapa, ukaw yäpar luratäspaxa” sasaw sawiyi.

Ukham jank’a jank’ak chhijlläwitak jawillt’apxatapatx, MAS ukankirinakax jaqix usuntas jan walt’an ukax juchanïni sasaw sawiyi.

“Chhijllayasirjamax ch’amanïtwa. Janiw chhijlläwin katjasiñatakikixa, jutir chhijlläw atipjañatakis ukhamaraki, ukhamarus Bolivia markachirinakan k’umar jakañaplant nayan marka apnaqañ munañax luririst ukax jan walïspawa” sasaw Jilïr Irpirix sawiyi./RAR