Image Uraq khathatimp Nepalan jan walt'ayatanaka (teleSUR)

Nepal, 26 uru qasäwi phaxsita 2015 marana (BTV, teleSUR).- 6,6 waranq waranq Nepalan jakirinakaw uraq khathatimp jan walt’äwir purt’awiyapxi, jupanakax uka markan 30 suyunakapanw jakasipxi, uraq unxtäwix 7,9 ukham ch’amanïnwa, kurmüruw khä markanx ukham makhipawiyatayna, sasaw Katmandú markankir Naciones Unidas ukankirinakax aka willkürux yatiyawiyapxi.

2.123 ukjakamaw jiwatanakax jilxattawiyi, usuchjatanakast 4.627 ukjarakiwa, sasaw Nepalan jach’unakapan qhipa yatiyäwipax saraki.

Jamie McGoldrick, Naciones Unidas ukan aruskipt’iripax, yanapt’añatak ukhamarakiw kunas uraq khathatimp uñstat jan walt’äwinakatakix munask ukatakiw, Nepalan Apnaqirinakapamp tantacht’asiwiyi

Thaqhañas qhispiyañas ch’amaptaspawa, jallu pachaw ukata, ukampirus “Nepalan apnaqirinakapar yanapt’añatakix wakicht’atapxtwa, aka mulljaskaña jan walt’äwin irnaqañatakix wakicht’atapxtwa (…) yanap munapk jupanakar yanapt’añatakix taqpach ch’amwa uñxtayatäni” sasaw McGoldrickax qhanancht’awiyi.

Uka pachparakiw, juk’amp jan walt’äwir purirjam jaqinakar yanapt’añatakix, laqak unxtasiñawa ukhamarakiw sum unxtasiña; jan juk’amp jiwirinak utjañapatakix sartasiñawa, sasaw yapt’awiyi. Jupatuqutx, Héctor González, Beijing markan jikxatasir teleSURan yatiyiripax, 62 Chinankir qhispiyirinakaw Nepalar qhispiyirix sarapxi, sasaw yatiyawiyi./ERAR