Image Edgar Ramos, Chukiyawu Irptañ Utan Yatiyiri (Jamuqa: Llika)

Jichhürux Centro de Operaciones de Emergencia del Departamento (COED) utanw markachirinakan p’iqichirinakapamp mayïwinakap yatiñatak tantachasitäni, Chukiyawunx jan sinti utan qhiparañax utjxan ukax kunjams irnaqatakïskaspa ukxats amuyunakapax ist’atarakïniwa sasaw tata Edgar Ramosax arsuwiyi, jupax Chukiyawu Irptañ Utan Yatiyirirakiwa.

“Jach’a markanakampin pata pampanakampin k’añask apnaqirinakampiw tantachasipxäxa, jaymasirinakampi, markachirinakan p’iqichirinakapampi, jach’a yatiqañ utankirinakampi, departamentosan 87 municipio irpirinakapampi, mayïwinakapaw ist’atäni” sasaw BTV ukanx arsuwiyi.

K’añask apnaqirinakax usut jark’aqasisaw irnaqañ munapxi, chikat jaqimpikiw k’añaskut sarnaqañ munapxi sasaw amuyt’ayañatak arsuwiyi.

Chukiyawu departamentonx kunjamas jutir simanat uksarux utan qhiparatäspa uk yatiñatakix jichhüruw Qullañ P’iqichiritx yatiyäw katuqapxäxa, departamentosan qullañ uñjirinakas (SEDES) yatiyäw uñt’ayapxarakitaniwa sasaw qhanancht’awiyi./RAR