Image Jeanine Áñez Jilïr Irpiri (Jamuqa: BTV)

Irpirinakjamax markasan yatichäw sumaptayañatakiw irnaqapxäxa, jan yäqatanakar juk’amp yäqañ utjañapataki, yatiqirinakar yanapt’añataki sasaw jichhüruw Jeanine Áñez Jilïr Irpirix aka mara yatichäw qalltaykasax arsuwiyi.

“Amuyt’apxañapataki, machaq yänak uñstayapxañapatakiw irpirinakjamax yatiqirinakar ch’amacht’apxäxa, yamakis mayninakar yäqañ amuysa, ukaw mä sapa amuyump yatichañat sipans apnaqatäni, ukax janiw yatxatatanakx Bolivian yäpar utjaykiti” sasaw Gualberto Villarroel yatiqañ utanx arsuwiyi, Rurrenabaque markana.

Markasanx lurañanakax waljawa, ukhamarus taqi jan walt’äwinakaw chiqpach arsus askichatäni sasaw sawiyi. Ukhamïpanx, yatichirinakan taqi irpirinakapampiw irnaqäxa, jupanakan mayitanakap ist’añataki sasaw sawiyi.

“Yatichirinakan mayitanakapax suma amuyt’atawa, ukhamarus yatichäw sarantañapatakix sum aruskipt’asaw taqi tamanakamp mä amtar puritäni” sawiyiwa.

Yatichirinakampiw aruskipt’awiyata, sapa kimsa phaxsiw yatiqirinakarux yatiqatap yatiñatak yant’atäni, janiw yatichirinakan mä sapa qillqañ pankapax utjxaniti, janiw chaninchäwinak mayjt’ayañatakix qullqix mayitäxaniti, irpirinakax física, química, biología yant’añ utanakx luqtasipkakïwa sasaw qhanancht’awiyi.

Bolivian jan usuchjañ utjañapatak amtax utjkixtu ukamp yatiqañaw Yatichañ Kamanarux mayiwiyata, “wawanakan mayninakar yäqapxañapataki, mayninakar yäqapxañapataki, jaqi masipar munapxañapataki”, jan akat qhipar warmi jiwayirinak utjañapataki sasaw mama Áñezax arsuwiyi.

“Jichha pachatakjamaw yatiychäw apnaqañasa, wawanakampir wayna tawaqunakampir yänak uñstayapxañapatakiw ch’amachaña. Tatituw ukham lurañän ukx uñjasistani, taqi Bolivia utjäwinakaruw khuyapayani” sasaw arsuñ tukuyawiyi./RAR