Image Víctor Hugo Cárdenas, Yatichañ P'iqichiri (Jamuqa: BTV)

Yatichañ P’iqichirimp Empresa Nacional de Telecomunicaciones (ENTEL) ukankirinakampix yatichirinakampir yatiqirinakampir tecnologíamp yanapt’añatakiw chharminthix laphinak rixt’awiyapxi. Atamirimp jayatpach yatichañ yatiqañatak yanapt’añataki, Yatiqañ P’iqichañ Utan llika chiqapar inak mantapxañapatakiw mä amtar puriwiyapxi.

“Yatichirinakamp Yatiqirinakamp llika chiqar mantapxañaptakiw aka amtampix yanapt’atäni (…) ENTELAmp Yatichäw P’iqichirimpix Bolivia yatiqirinakaruw yanapt’añ munapxtha, yatiqañax jan ch’amäñapataki” sasaw tata Víctor Hugo Cárdenasax arsuwiyi.

Jichhax ENTELamp llikar mantirinakax inakiw Yatichañ P’iqichirin llika janjapar mantapxani (www.minedu.gob.bo ukaru), Bolivian yatiqañatak yatiyäwinakax utjki ukaruw yamakis mantapxani, ukhamaw amtata.

Yatiqañ P’iqichañ Utan llika janjaparux markachirinakax inakiw mantapxani sasaw tata Eddy Luis Francox arsuwiyi, jupax ENTEL irpirirakiwa. Akürunakax  usuw markasans uraqpachans ch’iqitatawiyi, ukatw tecnologíax juk’amp munasi, ukatrak Bolivia markachirinakarux llikar mantapxañapatak yanapañ munata./RAR