Image Karen Longaric, Yaqha Markanakamp Aruskipir Kamana (Jamuqa: Llika)

Chilinx 138 Bolivia markachiriw COVID-19 usump usuntat jikxatasipxi, Iki Iki jach’a markana, jupanakax uka jach’a markanw Boliviar kutt’aniñatak qhiparasipki sasaw jichhürux mama Karen Longaricax arsuwiyi, jupax Yaqha Markanakamp Aruskipir Kamanarakiwa.

“Bolivia markachirinakat wali llakiskañ yatiyäw katuqtha, khithinakati Santiagot Iki Ikir qhiparañatak puripki jupanakata (…) 138 jaqiw COVID-19 usump usuntat jikxatasipxi, ukaw katjawiyata” sasaw jupa mama irpirix arsuwiyi.

Khithinakati uka usunïpki jupanakaruw mayninakat yaqhaqtayatawa, qullirinakaw uka Chili jach’a markanx jupanakar uñjasipki sasaw sawiyi.

“Ukax wali llakkayawa, Iki Iki jach’a markankirinakaruw llakisiyi” sasaw sawiyi, jupax “Estudio Abierto” wakichäwinw ukham arsuwiyi.

Siman tukusiw COVID-19 usump nayrïr usutx Bolivia markachirinak taypin katjawiyapxi. Ukham yatisast Chili irpirinakast taqinitw yatxatañ amtawiyapxi. Walürkamax 22 usutaw utjäna, jichhürkamast 138 usutaw utjxaraki.

Kurmürkamax 3.000 marka masisaw Chilinx jan usuntañatak utanakan qhiparasipkäna, yaqhipast utan jan usuntañatak qhiparañ muntha sasaw suyasipkaraki, ukhamarus “juk’amp waljamakïxiwa” sasaw mama Longaricax arsuwiyi.

Chilinx 60.000 marka masiw jikxatasipxasmachi, yaqhipax irnaqirikiw sarapxi, yaqhanakast ukanrak jakxapxi sasaw Yaqha Markanakamp Aruskipir Kamanax arsuwiyi./RAR