Image

Francia markankirinakax phisqha samsuñ yänakamp mä ecógrafomp markasar inak churanipxi, aka mara t’aqa phaxsit 17 uru saraqkipanw uka yänakax Boliviana de Aviación (BoA) awiyunat Qucha Pampa jach’a markar puriyanitäxani, ukham puriyaniñatakix ch’ama ch’amaw tukuta, janiw awiyunax apaniñatak jikxatañjamäkänti sasaw jichhürux Yaqha Markanakamp Aruskipañ P’iqichirix yatiyawiyi.

Bolivia markachirinakaw ukham inak yänak churanipxañapatakix khayan sarnaqapxatayna, markasan qullañ utanakax utjki uka chiqanakaruw COVID-19 usuninakar qullañatak churatäni.

Franciar khithat irpiriw uka yänak Ispañar inak puriyañatak sarnaqawiyi sasaw Yaqha Markanakamp Aruskipañ P’iqichirix yatiyawiyi, Ispañanx aka “mara t’aqa phaxsit 01 uru saraqkipanx janiw WAMOS awiyunar uka yänak apkatañ atipkataynati, uka awiyun apnaqirinakax janiw yänak apkatañ makinanïpkataynati ukata. Ukhamarakiw IBERIA awiyunanak apnaqirinakax aka mara t’aqa phaxsit 13 uru saraqkipanw Ispañat Boliviar tuyuniñ amtawiyapxi, ukhamarus janiw yänak apaniñ munapkiti, jaqik jupanakax q’ipnaqapxi ukata” sasaw yatiyäwix saraki.

Ukhamïpanx, aruskipawiyatawa, BoA awiyunat aka mara t’aqa phaxsit 17 uru saraqkipan Qucha Pampar yänak puriyaniñaw amtawiyata; uka chiqar puriyatatx Qullañ P’iqichiriw markasanx kunayman qullañ utanakar uka yänakx lakirani.

Aka mara t’aqa phaxsit 01 uru saraqkipanw monitoranakx puriyanipxtha, Aduana utankaskiwa, Qullañ P’iqichiriw uka chiqat apsusax lakirani sasaw Yaqha Markanakamp Aruskipañ P’iqichirix arsuwiyi./RAR