Image Javier Zavaleta, Markar Arxatir Kamana (BTV)

Palla Pall Utan Alberto Mansilla nayra irpiripax palla pallanak taypit jan mayamp katuqkay jaqsutäñapawa, Jilïr Irpirin silt’upamp chimpupamp jan sum uñjatapata, uka yänakx lunthatawiyapxiwa, walürump wasürumpiw jikxatawiyasipki, sasaw jichhürux tata Javier Zabaletax arsuwiyi, jupax Markar Arxatir Kamanarakiwa.

Anchhax, palla pallanakan taripirinakapaw tata Mansillxat yatxatasipki. Jupaw Jilïr Irpirin uskusiñapatak k’achacht’añ yänakx sum apnaqañapäna.

“Jupan juchachasitapax, qhipa urunakan luratanakat amuykipt’asax, jan mayamp katuqkay palla pallanak taypit jaqsuñaw wakisi”, sasaw tata Zabaletax sawiyi, ukhamarus Taripañ Jach’a Palla Pall Utan amtapaw suyatäni, sasaw qhanancht’awiyi.

Bolivia Qullqi Utat apsutäki ukjax, Palla Pall Uta p’iqichiriw Simón Bolivaran markasar jayt’at silt’x apnaqañapa, ukhamaw kamachinakanx saraki.

Juk’amp jank’ax, palla pallanakan p’iqichirinakapax, tata Roberto Juan de Dios Ortiz Blancor palla pallanak taypit jawsutäxiwa, sasaw yatiyawiyapxi. Juparuw Jilïr Irpirin silt’upamp chimpupamp chhaqhayatapat jilpach juch jaqusipki. K’añaskupatw lunthatanakax q’ipiñap apsuwayapxatayna, k’achachañ yänakax uka q’ipiñankänwa. Lunthatapkipanx, jupax anisqutamanakampiw ikintaskatayna.

Jan ukhamanak utjañapatakix, tata Zabaletax Palla Pall Utan irnaqirinakampiw tantachasiwiyi. Uka tantachäwix jan wali luratanak askichañataki, apnaqañ sumaptayañataki, k’achachañ yänak arxatañ amtanak askichañatakiwa, sasaw sawiyi.

Jaqsut palla pallax “sinti jan wal lurkaspän ukhampinw lurawiyi. Yamakis pall pallanakan jakañ kunayman saräwinakap t’unjawiyi. Kamachinakx kunaymantuqutrak t’unjawiyi”, sasaw tata Zabaletax arsuwiyi.

“Ukham luratapatx janiw jupan palla palläñapax wakiskänti”, sasaw arsuwiyi./RAR