Image Evo Morales Ayma, Estado Plurinacional de Bolivian mallkupa (Jamuqa: BTV)

Tarija, 26 uru qasäwi phaxsita 2015 marana (BTV). Evo Morales Ayma, Estado Plurinacional de Bolivian mallkupax, anatañatak wakicht’asipxañapatakiw Atlético Bermejompir Ciclónampir aka willkürux qullq churawiyi ukhamarakiw ukïrinakatx maynirix Liga Profesional del Fútbol Boliviano ukar makatawiyani uks jallallt’awiyaraki.

“Liga del Fútbol Bolivianon jan anatirinakanipki uka departamentunakar mantapxañapatak yanapt’añatakiw Bolivian Apnaqirinakapax amtanakanipxi, uk sañ munapxsma”  sasaw Suyu P’iqichirix qhanancht’awiyi.

Wakicht’äwinakapamp sarantasipkañapatakikix, jutir urunakaw 25.000 dolaranak sapa anatt’ir tamar churatäni, sasaw Moralesax sawiyi.

Qullqinakax Yacimientos Petrolíferos Fiscales Bolivianos (YPFB) ukampit Empresa Nacional de Electricidad (ENDE) ukampitw jutaraki, markasan amtäwip taypinx, uka irnaqañ utanakax kunayman anatirinakatakiw Boliviat anqa markar sarapxañapatak nayrjatpach yanapt’añ qullq apaqapxi.

Qhiparux, Ciclónampir Atlético Bermejompiruw niy Liga Profesional de Fútbol Boliviano uksar mantapxatapat jallallt’awiyi, anatañ yatipk uk uñacht’ayapxañapatakis arump asxart’ayawiyarakiwa./ERAR