Image Litiot yatxatir uta uñakipt'äwi (BTV)

La Palca, 20 uru qasäwi phaxsita 2015 marana (BTV).-Evo Morales Ayma, Estado Plurinacional de Bolivian mallkupax, Álvaro García Linera, arkir mallkump chikaw phaxsürux Centro de Investigación en Ciencia y Tecnología de Materiales y Recursos Evaporiticosamp Planta Piloto de Litiompw La Palca markan uñakipt’awiyapxi, P’utuqsi departamentuna.

2014 maranxa, nayrïr ion-litiot lurat baterianakwa yatxatas lurañ qalltasiwiyi. Jichhasti, 90,5% ukjakam q’umachsut carbonato de litiow apsutäski, akax wali aski yatxatäwirakiwa, ukatw sutisxar qillqantayatäni.

Ukhamarak, qhantayir ch’ama mistuñapatakix, aka apsutanakax fotovoltaico yänakaruw uskutäski, Qucha Pampanx pä ayllunakanw ukham lurasax yatiqatäxaraki.

Litioni baterianak lurañ utax La Palca markan yänak lurañ chiqan jikxatasi, Yuqalla municipiyuna, P’utuqsi departamentuna; $us 3,7 wawanq waranqa qullqiw churataraki.

Bolivianx litio q’umachsuñax k’achat k’achat sarantaski, markasarux uraqpachan litioni baterianak apnaqaskani ukjatakiw wakicht’ayxani, ukasti 2020 maratakiw amuyatäski./ERAR