Image Jamuqa: OMS

Mayamp Chinarux kunjams Wuhan ch’imi laq’ux uñstawiyi ukxat yatxatir sarapxäxa sasaw jichhürux Uraqpachan Qullañ Uñjirinakax (OMS) arsuwiyapxi.

“Kunjams qalltkipanx kunayman uywanakamp chikachasitäna ukxat yatxatir sarañatakiw China masinakamp aruskipatäski” sasaw mama Maria Van Kerkhovex arsuwiyi, jupax OMS ukanw usunakat yatxatas irnaqaraki.

COVID-19 usux “uywanakat uñstpacha” sasaw mama Van Kerkhovex yatxataski, “uñstir usunakax uywanakat makatistu” sasaw sixa.

COVID-19 usux uñstki ukjatpachx OMS ukankirinakax kimsa kutiw Chinar sarxapxi. Mama Maria Van Kerkhovex kimsïr saririnakamp chikaw saratayna, Chinarux “usux kuna uywats uñsti ukxat yatxatapxam” sasaw iwt’awiyata sasaw jupax sixa.

Wuhan jach’a markan uñstawayki uka COVID-19 usun uñstatapatx k’umisiñ qalltawiyapxi, ukatw mama Van Kerkhovex arsuwiyaraki. Estados Unidos irpirinakax Wuhan jach’a markan yatxatañ utanakax utjki ukan ch’imi laqux uñstayawiyata sasaw qhipa urunakax arsusipki.//RAR