Image Wilson Santamaría, Markachirinakar Arxatir Sullka P'iqichiri (BTV)

Bolivia Palla Pall Tamax 194 marwa aka phaxsix phuqhani. Ukatw uka tamankirinakax urup amtañ qalltawiyapxi, panqaranak tata Antonio José de Sucren uñnaqap jak’ar Chukiyawun uskuwiyapxi.

“Marka irpirinakaruw yuspajart’añ muntha, (Jeanine Áñez) Jilïr Irpir kullakaru, juk’ampis Arturo Murillo Marka Apnaqañ P’iqichiriru. Jallallt’apxsmawa (…) Irnaqasaw urusx amtasiñäni. Usun sarnaqatapatx, janiw kayuk sarantañas jach’a jikthaptäwinakas amtañatak utjkaniti, ukhamarus ukax janiw amtasiñ armasiykistaniti” sasaw tata Wilson Santamaríax arsuwiyi, jupax Markachirinakar Arxatañ Sullka P’iqichirirakiwa.

Jupa tata irpirix kunjams palla pallanakax COVID-19 usu sarnaqkipanx irnaqawiyapxi ukw jach’acht’awiyi. Jumanakax markachirinakar arxatapxakipintawa, jiwañar purt’asiñs janiw axsarapktati sawiyiwa. Palla pallanakan jiwapxatapatw chuymacht’añ munapxsma; jupanakax irnaqkasaw warmip wawap jaytjawiyapxi, Tayka Kamach phuqhkasaw jaytjasiwiyapxi (…) Markasan markachirinakan mayamp apnaqasipxañapatakix ch’ama ch’amw tukuwaytan; ukatw walpin yuspajart’apxsma sasaw tata Santamaríax arsuwiyi.

Kunjams palla pallanakax markachirinakan utan jist’antat jakapkipanx irnaqawiyapxi uks jach’acht’awiyarakiwa. Nayrat irnaqawayktan ukham irnaqasktanxa; ukatw palla pallanakan (Sergio Orellana) p’iqichiriparus yuspajart’araktxa, jichhat uksarux Bolivia markan askipatakix ukham irnaqañaw utjani sasaw sawiyi./RAR