Image Markat Arsurinakan tantachäwipa (Jamuqa: Markat Arsurinaka)

Chukiyawu, 21 uru qasäwi phaxsita 2015 marana (BTV).- Kamachinak Lurir Tantachäwin Aynach Tamapax atüru arumax, taqpach uñjas ukhamarak qhanancht’atanak uñjasax, Programa de Gestión de Riesgo ukar ch’amancht’añatak 200 waran waranq dolaranak mayt’asiñatakiw jaysawiyi.

“Banco Mundialan nayrïr Boliviar yanapt’añ qullqipawa, pä qullqi churir utt’ayäwipampi, Asociación Internacional de Fomento (AIF) ukax taqit pisin jakasir markanakaruw yanapt’añ qullq mayt’i, Banco Internacional de Reconstrucción y Fomento (BIRF) ukast tantiyu qullqini markanakaruw qullq mayt’i”, sasaw Markat Arsurinakan yatiyir qillqatapax saraki.

Uka qullqimpix kimsa amtanakaw sartayañ amtatäski, pachan jan walt’ayatanakapampir chhijir puriyatanakapampir sum apnaqañataki.

Nayrïr amtarjamax, pachan jan walt’ayatanakap uñjañatak ukhamarak pachan turkakiptäwipamp qamañatakiw ch’amancht’atäni; payïr amtarjamast, chhiji utjki uka chiqanakar laq puriñatak, kunayman tamanakpur aruskipt’añwa amtatäski, kunayman chiqanakan chhijinak sum apnaqañataki.

“Ukañkamasti, kimsïrix markan qullqipax walikiskañapatakik ch’amancht’aña ukhamarak Bolivian qullqipax juk’amp utjañapatak askicht’aña ukarakiwa”, sasinw qillqatax qhanancht’i.

Boliviax uma qurqunakamp, mach’anakamp, uraq alliqtirinakampiw sapa kutix kunayman jach’a markanakan ayllunakan jan walt’ayata, uka jan walt’äwinakast markan jakäwipw jan walt’ayapxi ukhamarakiw qullqichäw jiltayañs qhipartayapxi, sasaw Markat Arsurinakan jaysat amtäwipan qhanancht’äwipax saraki./ERAR