Image Evo Morales Ayma Mallku (Jamuqa: BTV)

Santa Cruz, 20 uru llamayu phaxsita 2015 marana (BTV).- Evo Morales Ayma, Estado Plurinacional de Bolivian mallkupax, atürux La Haya markankir Corte Internacional de Justicia (CIJ) uksankirinakax kunxay lamar qutxat mayitatx sapxchini, ukx markasax jaysaniwa, sasaw sawiyi.

“Boliviax La Hayax apskan taqpach uka amtatanakapw wali yäqani. Ukhamax Bolivia markan sutipxaruw sañ munapxsma, akax Marka Apnaqirinakan amtäwipawa, Boliviax yäqanit janich uka amuyatanakxata”, sasaw p’iqichirix Chiquitano sutin utat, Santa Cruz markatpach, sani.

Chile marka nayra apnaqirix, Eduardo Frei, Bolivia apnaqirinakaruw phaxsürux Boliviax CIJ ukan amtatanakapx yäqanit janich sasin sani, ukatw Suyu Apnaqirix ukham arsuraki. 

“Bolivian luratapaw juk’amp llakisiyitu, janiw taripañ jaysäwir yäqañxatx qhan arsupkiti, akax mä wakicht’ayat amuyuwa, sapxiwa. ¿Taripañ jaysäw yäqapxanit janicha jan ukax aka uñt’ayäwimp sarantasipkakinicha?”, sasinw Patricio Walker Chilin senadopan p’iqichiripamp jikisisax sani.

Uka jak’ankir markan apnaqirinakapamp walja kuti tantachasisax janiw kunas Boliviatak jikxatatäkiti, ukatw lamar qutar mistuñatak mä aruskipt’aw jikxatañatak Chilituq CIJ uksan taripañ mayiñ amtata, sasaw Moralesax qhanancht’awayi.

“Jiwasax sumäñat askichañ thaqhañatakiw Chilituq mä taripaw uskuntawaytan, La Hayatpach saräwi, kamachi, amuyu uñjas suma taripasiñapataki, ukhamïpanx Chiliw La Hayan amtatanakapx yäqanit janich ukx saniñapa, ukampirus uka taripañ utan luräwipax janis wakiskasp ukham Chilix jan yäqañ munaski ukx jumanakax (boliviankirinaka) yatipxtawa”, siwa.

Uka pachparakiw, Bolivian jan walt’äwip askichañatakix CIJ ukan luräwipamp, walja markar uñjir kamachinakamp aru churatanakamp yäqir aytaskañ markapan, sasin Chilirux Suyu Apnaqirix mayiwayi./ERAR