Image Usutanak samanan tuyus q'ipir jiru jamch'inaka (Jamuqa: BTV)

Beni, 24 uru qasäwi phaxsita 2015 marana (BTV).- Urürux, Bolivian Evo Morales Ayma mallkupax phisqha samanan tuyus usut q’ipirinakw (jiru jamach’inaka) churawiyi, ukanakax inti jalsunkir Beni departamentun laqak qullir sarañatakiw yanapt’apxani.  

Phisqha jiru jamach’inakax jan wali qullanak apnaqirinakar aparatawa, Fuerza Especial de la Lucha Contra el Narcotráfico ukankirinakaw aparapxäna, ukanakampix Benin 19 municipiyupanw usutanak qullañax askicht’añ munata, sasaw Suyu Irpirix qhanancht’awiyi.

“Uka jiru jamach’inakax jan wali qullanak apnaqirinakaruw aparawiyata. Nayrax jiru jamach’inakax taripirinakan amparaparuw qhiparxirïna, ukampirus jichhax kamachinakarjam sumaptayañatakiw irnaqañ amtaptha ukhamarak ukanakamp markachirinakar yanapaña; ukatw, jichhax aka jiru jamach’inakax k’umar jakäw sartayañatak uskuta”, sasaw Moralesax sawiyi.

Jupatuqutx, Ariana Campero, k’umar jakäw kamanix, uka usut q’ipirinak churañatakix, niya chikat waranq waranq bolivianunakaw tukjasiwiyi, ukampix jiru jamach’inakan laqak qullañatakiw yänakax uskuntawiyata, sasaw qhanancht’awiyi.

Uka phisqha jiru jamach’inakatx kimsaniw usutanak q’ipiñataki, ukañkamax, payax usutanakan wila masinakapar q’ipiñatakiwa, sawiyiw uka irpirixa.

Uka samanan tuyus usut q’ipirinak churasax, K’umar Jakäw Kamanix, Benir kimsa qullirinakatakiw irnaqäw uñstayawiyi, jupanakaw uka jiru jamach’inakanx usutanakar uñjapxani./ERAR