Image Aparat jisk'a awiyuna (BTV)

Unidad Móvil de Patrullaje Rural (UMOPAR) ukankirinakax mä jisk’a awiyunamp awiyun utamp pusi k’añaskump mä thara tharampw Bella Vista markan aparawiyapxi, Iténez provinciana, Benina, ukhamw tata Juan Percy Fríasax jichhür arsuwiyi, jupax Fuerza Especial de Lucha Contra el Narcotráfico (FELCN) irpirirakiwa.  

“Cessna awiyunaw aparawiyata, janq’ump uqimpiwa (…) Ukhamarakiw awiyun utas pusi k’añaskus mä thara tharas aparawiyata” sasaw sawiyi.

Mara t’aqa phaxsit 4 uru saraqkipanw UMOPAR palla pallanakax Bella Vista markar puriwiyapxi. Uka chiqarux ñanqhachir qullanak apnaqirinakaruw katuntañ munapxäna, ukhamarus markachirinakaw jan mantayawiyapkiti, COVID-19 usu utjipanw jark’antasiwiyapxi ukata.

“Ukatatx, aka mara t’aqa phaxsit 13 uru saraqkipanx, Bella Vista markachirinakax mä jisk’a awiyunwa aparawiyapxi sasaw yatisiwiyi” sasaw jupa tata p’iqichirix arsuwiyi. Ukham ist’asax, palla pallanakax mayamp uka markar mantañ yant’awiyapxi, ukhamarus Bella Vista markachirinakamp Magdalena markachirinakampix usuw utji, janiw mantapkasmati sasaw sawiyapxarakikitu sasaw sawiyi.

Ukhamïpanx, markachirinakampiw tantachasiwiyapxtha, irpirinakapampi, Tommy Añez, Magdalena marka irpirimpi; mä amtaruw puriwiyapxtha sasaw sawiyi. “Tantachäwinx, Bella Vista uraqimpin Magdalena uraqimpin UMOPAR palla pallanakax ñanqhachir qullanak apnaqirinakar arknaqasipkañapatakikiw amtawiyata” sasaw tata Fríasax arsuwiyi.

Ukatw palla pallanakax mä jisk’a awiyunamp awiyun utamp pusi k’añaskump mä thara tharamp jikxatawiyapxi, janiw kuna ñanqha qulls katjawiyapkiti, ukhamarus ukhamanak jikxatañatak irnaqasipkakiniwa sasaw sawiyi./RAR