Image Jeanine Áñez Jilïr Irpirix palla pallanakaruw arxayaski (Jamuqa: BTV)

Jeanine Áñez Jilïr Irpirix palla pallanakaruw 194 mara phuqhapkipan aruntt’awiyi, jan walinakat arxatasiñatak wakicht’ayasipxam sasaw sawiyi.

“Bolivia palla pallanakaruw mayiñ muntha, wakicht’asipxam. Bolivianx ñanqhachir qullanak tukjaña, jan wali lurinakar kutjayaña, jan wali jaqinakar katuntañaw munasini” sasaw Jilïr Irpirix sawiyi.

COVID-19 usu utjatapat markachirinakan utan qhiparapkipanx palla pallanakax yäparuw irnaqawiyapxi, yaqhipax yamas jiwawiyapxiwa sasaw sawiyi.

Markachirinakan jan usuntapxañapatakiw irnaqaña, qullqichäwiw kutitatayaña, irnaqäwinakaw markachirinakatak uñstayaña sawiyiwa. “Taqiniw qullqichäw kutitatayañatakix irnaqañasa, irnaqäwinak uñstayañataki. Chhijit jark’aqasis qullqichañaw utjañapa, palla pallanakax kunas lurapxañapa ukx qhanpach yatipxarakiñapa” sasaw Jilïr Irpirix arsuwiyi.

Ñanqhachir qullanak apnaqirinakax markachirinakan utan jist’antat jakapxañapkamaw juk’amp ch’amachasiwiyapxi, Chapare uraqimpin Benimpin yamakis ukhama sasaw sawiyi.

“Bolivia palla pallanakax maymaraw lapaka phaxsïkipan marka apnaqasiñ markachirinakar kutt’ayawiyapxi (…) Palla pallanakax k’umar jakañ utjañapatakix yanapxiwa, utan jist’antat jakañatakiw irnaqawiyapxi” sasaw Jilïr Irpirix arsuwiyi.

Evon arkirinakapax ch’axwayasaw markasarux kutt’aniñ munapxi, antenanak phichkatawiyapxi, yatiyirinakaruw katuntawiyapxi, palla pallanakaruw Chaparet alissuwiyapxi sasaw sawiyi. Akhamaw uñjasiski. Walja ch’axwañ munirinakaw markachirinakan utan qhiparapkipanx qutuchasisipki, lawas apt’ataw sarnaqasipki; Evon arkirinakapax ch’axwayasaw t’aqa t’aq sarnaqayañ munistu” sasaw Jilïr Irpirix arsuwiyi.

“Bolivia palla pallanakaruw mayiñ muntha. Bolivia markamp chik irnaqañ amtañawa, yäpar sarnaqayañataki, kamach yäqañataki, markasan jan chhijir puriñ utjañapataki; jan yäpar sarnaqañ utjan ukax, jan chhijit jark’aqaskañän ukax, jan kamachix yäqatäkan ukax, Bolivia utjäwinakanx qullqichäwix aynacht’askakiniwa” sasaw sawiyi./RAR