Image Herlan Soliz, YPFB nayra irpiri (BTV)

Herlan Soliz, YPFB nayra irpirin markasat mistuñap amtawiyapxtha, nayrïr simanax jupar katuntasiñapatakiw amtawiyataraki sasaw jichhürux tata Marco Antonio Cossiox arsuwiyi, jupax Chukiyawunw taripañatak yatxatirinakar irptaskaraki.

Seguronak jan yäpar apnaqatapatjamw tata Solizarux taripayasipki, ukarakw juparux katuntayañ amtawiyapxi. Jupax pä kuti jaysayatas janiw arsur sarxataynati, ukatw ukham amtawiyapxaraki.

“Nänakax pä kutiw kamach phuqhas jawsayawiyapxtha, mantawiyatäki uka utana ukhamarak arxatiriptuqutsa. Santa Cruz jach’a markan nayax arsuristha sasaw mä qillqat puriyawiyi, janiw jupan munañapar luraskaspati, taripañatak yatxatirinakan amtataparjamaw yatxataña” sasaw tata Cossiox arsuwiyi.

Nayrïr simanaw taripayañatak yatxatirinakax Solizan utapar mantawiyapxi, janiw juparux jikxatawiyapkiti. Ukatw jan markasat mistuñapatakix yatiyawiyapxaraki. Solizax arsur jutpan sasaw Cossiox sawiyi.

“Nänakax jan (markasat) mistuñapatakiw yatiyawiyapxtha. Jupax janiw Boliviat mistuñ atkaniti, markasar ukxat qhanancht’ir jutpan sasaw iwxt’apxiristha. Jupax janiw juchanïkt siwa, ukhamax arxatasir jutpan. Nänakax kamisti kamachisax siski ukhamarjamaw irnaqapxäxa” sasaw tata Cossiox arsuwiyi. Yatxatirinakjamax irnaqasipktwa, janiw khithirus arknaqañ amtapktti, sasaw nayrïr simanax tata Solizax arsuwayki ukxat qhanancht’añatakiw arsuwiyi./RAR