Image Jilïr Irpirix Corpus Christi urwa amaski (BTV)

Jichhürux tatakuranakaw Chukiyawunx Corpus Christi amtawiyapxi, Murillo palasana. Jilïr Irpirix ukankawiyiwa, jupax Bolivia markachirinakaruw mayacht’asiñatak arxayawiyi, anchhax uraqpachanw COVID-19 usux jan walt’ayaski ukata. K’umar jakañaw chhijlläwit sipans nayrakañapa sasaw sawiyi.

Corpus Christi urux COVID-19 usu utjkipanw amtasiwiyi, uka usun saratatatapatw jan walja jaqix jichhür jikthaptawaykiti. Chukiyawunx tatakuranakaw misawiyapxi, Edmundo Abastoflor tatakuraw misawiyi. Murillo palasanw kayuk sarantawiyapxi, Áñez Jilïr Irpirix ukankawiyiwa ukhamarakiw yaqhip p’iqichirisasa.

“Lup’ikipt’añ urüpan. Suman jakañax taqi utjäwinakan utjpan, aski yatiyäwinak munañax ukhamaraki, yanapt’asiñax ukhamaraki. Nayax khithinakati utjäwipankirinakar jiwayasiwiyapki jupanakaruw chuymacht’tha. Usun akham jan walt’aykipanx sarantaskakiñäniwa” sasaw Jilïr Irpirix arsuwiyi.

Kamachiñ Tantachäwinkirinakax 1297 Kamach chhijlläw utjañapatak amtawiyapxi, Jilïr Irpiriruw rixt’añapatak apayapxi. Uka kamachinx sata qallta phaxsit 6 uru saraqkipanw jaqüwix utjan siwa, Chhijllayañ Utankirinakaw (TSE) ukham amtasiñap mayiwiyapxi. Yaqha irpirinakarux yäqañawa, ukhamarus ukham lurasax markachirinakaruw usuntaysna sawiyiwa.

“Nayax ‘janiw rixt’kät” sasin säx ukax markx apnaqañ munaskakiwa sasaw sapxitani. ‘Rixt’äw’ sasin sä ukax k’umar jakañ jan walt’ayasktxa. Ukhamïpanx, ch’amawa. Markasan yaqha irpirinakaparux yäqañawa, ukatw Chhijllayañ Utankirinakan amtatapx iyawsäxa, ukhamarus nänakax jan usuntañatakiw irnaqasipktha, nänakax k’umar jakañ utjañap munapxtha, jichhast taqi Bolivia markachirinakan jan usuntapxañapatakiw irnaqasipktha” sasaw Áñezax arsuwiyi.

Kamach rixt’añatakix lup’ikipaskaktati sasin jiskht’atax, Jilîr Irpirix “ukhamawa, jichhaw k’umar jakañax nayrankañapa, ukham amuytha” sasaw sawiyi./RAR