Image Altu Patan thakhinak jist'arkasa (Jamuqa: BTV)

Altu Patanx yaqhip thakhix jark’antataw chharminthix uñstawiyi, manq’ananak apanir k’añaskunakax janiw mäkhipaniñ atipkänti. Jach’unakamp palla pallanakampiw uka thakhinak pichsuñatakix puriwiyapxi.

Jach’unakax kawkhanti thakhx jark’antasipkän ukjaruw jak’achasiwiyapxi, thakhi jark’antirinakast qalampiw jupanakar jaqxawiyapxi, ukatx jaltawayxapxiwa sasaw Liceth Quisbert yatiyirix yatiyaniraki. Ukatatx, yaqhip thakhi jark’antirinakaruw katuntawiyapxaraki.

“Ch’axwañ munapxi, janiw ukx yäqapktti. Janiw yäqapxätati, janiw jachayir jiwq’x antutapxätati sasaw Altu Pata p’iqichirix sapxitu, yatitäk ukhamarjam sarnaqañataki” sasaw tata Freddy Valdax arsuwiyi.

Pusi qutuw Vela sutin chakampir San Roquempir thakhinak jist’arir puripxtha sasaw qhananach’awiyi.

“Ukham lurapxatapatx jan Covid-19  usump piykatatanakax jilxattaspati” sasaw arsuwiyi.

Wasürux Movimiento Al Socialismo (MAS) ukankirinakax chhijlläw utjañapatakix “q’uxu q’uxunakamp sartasiñäni” sasaw sawiyi. Ukhamïpanw uka tamankirinakax thakhinak jark’antañ amtawiyapxi, altu Patanx mä jaqi q’ipir k’añaskurus tutukxatawiyapxarakiwa./RAR