Image Qullirinakax utat utw sartawiyapxi (BTV)

Trinidad jach’a markanx qullirinakax utat utw COVID-19 usump usutanak jikxatañatakix sartawiyapxi, 1050 usut jikxatawiyapxi, 19.188 utaruw purt’awiyapxaraki, ukhamw Fernando Lópezax arsuwiyi, jupax Marka Arxatañ P’iqichirirakiwa.

“Jichhax qawqhas ukw yatiyapxäxa, ukhamatw amtax kunjamas phuqhasiwiyi ukax amuyatäni. 2.018 manzanoruw puriwiyata, 19.188 utaru, 29.522 utjäwiru, 111.997 jaqimpiw jikxatasita, 1.050 jaqiw usutjama, 1.038 jaqiw yaqha usunakamp usuntatjamaraki" sasaw jupax arsuwiyi.

Trinidadanx 97% chiqaruw utat ut sartasax puriwiyapxi ukhamw Lópezax arsuwiyi. Mä uruw samart’apxani, ukatx utat utx mayamp sartapxarakikiniwa. Uka jurpürkamaw taqpach Trinidad jach’a marka utanak tuktañx amtasipki.

Utat ut sartirinakax manq’añanakx markachirinakar churawiyapxarakiwa, 112.431 tonelada manq’añ lakirawiyapxi sasaw sapxi. Akürunakax Trinidad jach’a markax jark’antataw jikxatasi, COVID-19 usun jan juk’amp saratatañapatakiw jark’antawiyapxaraki./RAR