Image Caranavi thakhinak qulla umamp chhixsuyasipki (Jamuqa: BTV)

Caranavinx pä markachiriw COVID-19 usump usuntat utji, yaqhanakas usuntatarakiw jikxatasipxaspa, ukatw aka marka irpirinakax tantachasiwiyapxtha, taqinin utan jist’antat jakapxañap amtawiyapxtha sasaw tata Daniel Paucarax arsuwiyi, jupax uka jach’a marka irpirirakiwa.

“Kamach amtawiyapxtha, municipio kamachiw utji, chikärmat uksarux jichhürux taqin utan jist’antat jakañaw utji. Uñjapxäwa, pä (COVID-19) usutaw utji, yaqhanakax jikxatañäskarakiwa” sasaw jupa tata irpirix arsuwiyi.

Qullirinakax Caranavit Chukiyawuruw jutxapxi. Jupanakarux yaqhip markachirinakaw jan walt’ayawiyapxi, ukatw jutxapxi. Qullirinakan kutt’apxañapatakix jichhürux departamentosan qullañ p’iqichirinakampiw (SEDES) aruskipäxa sasaw sawiyaraki.

“Taqiniw yatiqañasa, yanapt’asiñaw utjañapa ukata. COVID-19 usu jan saratatañapatakix amtanakaw phuqhaña, sumaw sarnaqasiñasa. Ukhamatak (uka usutx) jark’aqassna, janiw yaqhax utjkiti. Janiw kuna qullas qullasiñatak utjkiti, amtanak phuqhasakiwa, markachirinakax suma sarnaqasipxañaparakiwa” sasaw jupa tata irpirix arsuwiyi./RAR