Image Jamuqa: Arturo Murillon Twitteran uñt'ayata

Wasürux Q’ara Q’aran, Qucha Pampana, katuntawiyapki uka palla pallarux qhispiyawayxapxtwa sasaw jichhürux Arturo Murillox yatiyawiyi, jupax Marka Apnaqañ P’iqichirirakiwa.

“Qhantatiw Mayta caborux qhispiyawayxapxtha. Juparux Evon arkirinakapaw Q’ara Q’aran ch’amamp katuntawiyapxi. Pä thakhiw utji: MAS ukan ch’amamp jan walt’ayatapamp jiwasan kamachimp sarantatasampi. Mayacht’asiñän ukax ch’amamp jan walt’ayirinakarux atipjañäniwa” sasaw qillqt’awiyi.

Palla pallarux 5:45 jayp’ut 6:00 jayp’ukamaw Q’ara Q’arar mantkipan katuntawiyapxi sasaw tata Franz Sellisax yatiyawiyi, jupax Qucha Pampanw palla pallanakar p’iqicht’askaraki.

Q’ara Q’aranx kimsa jaqiruw thakhinak jark’antapxatapat katuntawiyapxi, ukatjamakw palla pallarux ukham katuntawayxapxaraki sapxiwa./RAR