Image Óscar Ortiz, Qullqichäw Jiltayañ P'iqichiri (Jamuqa: BTV)

Irpirinakax qullqichäw kutitatayañatakiw kamachinak utjañap wasürux amtawiyapxtha sasaw tata Óscar Ortizax arsuwiyi, jupax Qullqichäw Jiltayañ P’iqichirirakiwa. 4270 kamachiw juk’a qullqichirinakampir tantiy qullqichirinakampir 500 waranq waranq bolivianomp yanapañatakix utji sawiyiwa. Yamakis COVID-19 usur kutkatañatakix 800 waranq waranq dólaraw mayt’asiñ munata, Kamachiñ Tantachäwiruw amtax kamachiptayapxañapatak apayata sawiyiwa.

“4270 kamachit arsuñ muntha. Banco de Desarrollo Productivo ukankirinakaw 500 waranq waranq bolivianx qalltañatakix juk’a qullqichirinakampir tantiy qullqichirinakampir mayt’apxani” sasaw Ortizax arsuwiyi. Mayt’asit qullqix phisqha maranw phuqhatäni, mä maramprak uñtapxaspa.

Jeanine Áñez Jilïr Irpirix Amtanak Wakt’ayañ P’iqichirimp Qullqichäw Apnaqañ P’iqichirimpiw qullq mayt’asiñatak aruskipawiyi, 800 waranq waranq dólar COVID-19 usur kutkatañatak mayt’asiñataki; 350 waranq waranq dólarax Banco de Desarrollo de América Latina (CAF) ukat mayt’asitäni, 450 waranq waranq dólarast Banco Interamericano de Desarrollo (BID) ukatraki sasaw sawiyi.

Markasan qullqichäwip kutitatyañatakix, anqa markanakar yänak apañatakiw mä kamachix utji, kamachiw mayjt’ayaña, khithinakati anqa markanakar aljañ munapki jupanakaruw yanapt’aña, ukhamatx irnaqäwis markachirinakatak utjaniwa sawiyiwa. Irnaqañatakix yänakax 360 uruw markasankaspa, nayrax 180 uru qhiparañapatakikiw iyawsatäna./RAR