Image Phisqha usut q'ipir k'añask Monteror puriyawiyapxi (Jamuqa: Bolivia TV)

Eidy Roca, Qullañ P’iqichirimp, Arturo Murillo, Marka Apnaqañ P’iqichirimpix Montero markaruw puriwiyapxi, ukanx phisqha usut q’ipir k’añaskunak utat uta saras COVID-19 usutanakar jikxatañatak luqtawiyapxi. 60 jaqiw utat uta sartañatakix puriwiyapxaraki.

Santa Cruz departamentonx, Monterow payïr chiqanx walja usutaninak taypinx jikxatasi. Qullañ P’iqichiriw utat uta sartañx amtawiyi, yaqha irpirinakas uka amtamp phuqhasiñapatak yanapt’apxarakiniwa.

“Usut q’ipir k’añaskunakax phisqhawa, niya 60 jaqiw utat utx sartapxani, ukham lurañw Qullañ P’iqichirix jan uka usump juk’amp piykatatanak uñstañapatak lurañ amtawiyi. Ukhamatw khithinakati usut jikxatasipki, usutjamäpki jupanakarux jikxatas qullatäni” sasaw jupa mama irpirix arsuwiyi.

Aka amtax “Markachir pura uñjasiña” sutiniwa sasaw mama Rocax sawiyi. Uka amtampiw irpirinakasax kunayman municipion irnaqasipki. COVID-19 usutanakax jikxatatäskiwa, usutjam jikxatasipki jupanakarus ukhamaraki. Ukhamat usut jikxatasipki jupanakax jan yaqhanakar piykatapkaniti.

Utat uta sartir qullirinakax janiw COVID-19 usutanakak uñjapkaniti, yaqha usuninakarus uñjapxarakiniwa sasaw Qullañ P’iqichirix arsuwiyi.

“Akham irnaqañaw anchhax juk’amp khusa, ukampiw markachirinakan jan walt’apxañapatakix sarantatäski” sasaw mama Rocax sawiyaraki./RAR